Aisialdiaren auzolana loratzen lemapean ospatuko da igandean, martxoak 30, Basoa gunearen 4. urtemuga

Lau urte bete dira martxoaren 27an Laudio institutuaren eta Kirikino aisialdi taldeak Laudioko Isasi auzoko zentroan elkarlanean Basoa espazioa eta proiektua antolatzen hasi zirenetik. Asteburu honetan -igandean, martxoak 30-, auzolan askotako abenturak gogoan, egitasmo eta gunearen 4. urteurrena ospatuko da. Egitarau berezia prestatu dute kideek datarako.

Egun osoan zehar, Basoa gunearen zein proiektuaren gaineko ekarpenak egiteko gunea egongo da, adin guztietarako espazioa egongo da eta ideia guztiak jasotzea da ideia, datozen urteetako ibilbidea elkarrekin pentsatu ahal izateko. Kirikino aisialdi taldearen gaineko ekarpenak jasotzeko beste gune bat ere atonduko da, aurrekoaren helburu berdinarekin, etorkizuna elkarrekin diseinatzea.

Egitaraua

Goizean kalendula landareekin egindako ukendua egiteko ikastaroa egongo da, 11:00etatik aurrera. Eguerdian, herri bazkaria antolatu dute, entsalada, arroza eta postrearekin. Bazkaltzera animatzen diren lagunak 68872665 zenbakiaren bitartez adierazi beharko dute larunbata baino lehen. Kirikinoren proiektuko kideentzako otordua doan izango da, aldiz, bazkide ez direnek 5€ ordaindu beharko dituzte.

Arratsaldean, orientazio froga egongo da espazioan zehar (haur eta helduentzako), bisita gidatua ere egingo da, orain artean emandako eraldaketak aztertu ahal izango dira honetan. Eguna borobiltzeko, Sorgina Txirulinaren ipuin kontaketa saioa egongo da espazioko liburutegian.

Egitasmoaren kartela