Ginea Berriako Papua inguruetan ohikoa den jolasa da "ver ver aras lama" izenekoa. Hondartzan daudela praktikatu ohi dutela jakin du Kirikinok.

Jokalarien adina 7 urtertetik gorakoa izatea gomendatzen da jolasean aritzeko eta 4 jokalari behar dira. Ozeaniako jolas honekin hasi aurretik, bost uztai eta pilota txiki beharko ditugu.

AZALPENA

Jolas hau hondartzan jolastekoa da; harean borobilak markatzen dituzte eta piloten ordez kokoak erabiltzen dituzte. Hala ere, bestelako espazioetan eta materialekin jolasteko egokitu daiteke jolasa.

GARAPENA

1. Lau uztaiak beraien artean 3 metroko distantzia dutelarik lauki bat osatuz kokatuko dira. Beste uztaia laukiaren erdian kokatuko da. Eta pilotak barruan jarriko dira.
2. Uztai bakoitzaren barruan jokalari bat kokatuko da. Helburua jokalari bakoitzak bere uztai barruan hiru pilota izatea da; horretarako erdiko uztaitik edo beste jokalarien uztaietatik lapurtuko ditu.
3. Bidai bakoitzean pilota bakarra eraman daiteke eta uztaian utzi behar da, jaurti gabe. Jokalariek ezin dute beraien pilotak babestu eta debekatuta dago beste jokalariak oztopatzea.
4. Hiru pilotak bere uztai barruan arinen jartzea lortzen duena irabazlea da.

*Mundua jolasean liburutik hartutako jolasa.